Log aksar sawaal karte hain: “Jab itne saal guzr gaye, log badalte rahe, hukoomatein aayi gayi, to kya Quran bhi badla hoga?”
AJ hum Quran ki tareekhi hifazat, uski jama’at (compilation), aur mukhtalif qira’aton ke peechay chhupi hikmat ko samjhayenge. Saath hi ye bhi dekhenge ke kya Quran waqai Bible ki tarah corrupt hua ya nahi.
Hazrat Abu Bakr Aur Quran Ki Pehli Compilation
Jang-e-Yamama me kai huffaz shahid ho gaye the. Is wajah se Hazrat Umar (RA) ne Hazrat Abu Bakr (RA) se kaha ke Quran ko likhwakar ikattha karwa lena chahiye.
Ye kaam Medina me un Sahaba ne kiya jo jang me shaamil nahi the. Ye pehlA marhala sirf ek symbolic collection tha — taake Quran ka lafzi tor pe hifazat ho sake.
Hazrat Usman Aur Dobara Compilation Ka Marhala
Log poochte hain: Jab pehle hi Quran jama ho gaya tha to Usman (RA) ne phir se kyun karwaya?
Jawab ye hai ke pehli dafa kai Sahaba shaamil nahi ho sake the. Ab unko bhi shaamil kiya gaya. Lekin iska matlab ye nahi ke koi ayat reh gayi thi ya nayi jodi gayi thi.
Usman (RA) ne wahi original Mushaf mangwaya aur usi ke mutabiq dobara likhwaya. Hazrat Zaid bin Sabit (RA) ki sarbarahi me ek committee ne poora kaam dyan se anjam diya.
Qira’at Aur Pronunciation Mein Farq Kyun Hai?
Us waqt Quran me harkatein (zabar, zer, pesh) nahi hoti thi. Isi wajah se kuch lafzon ko mukhtalif andaazon se padha ja sakta tha — jaise “Malik” aur “Maalik”.
Ye variation khud Nabi ﷺ ke daur me maujood tha, aur Aap ﷺ ne iski ijaazat di thi. Isay “Seven Letters” yaani “Sab’ah Ahruf” kehte hain.
Ye bilkul waisa hai jaise English me “Schedule” ko koi “Skejule” bolta hai aur koi “Shedule” — pronunciation alag, lekin matlab ek hi.
Qurani Copies Mein Spelling Ka Farq Kya Hai?
Kuch log poochte hain: Agar Quran same hai to mukhtalif copies me spelling ka fark kyun?
Jawab ye hai ke tamam copies exact carbon copy nahi thi. Kuch lafzon ko dono qira’at ke mutabiq likhna technically possible nahi hota.
Is wajah se ek copy me “Wassa” aur doosri me “Awsa” likha gaya. Agar alternate lafz footnote me likhte to usay secondary mana jata — jabke dono readings Nabi ﷺ se mutawatir hain.
Kya Kisi Copy Se Ek Lafz Ka Na hona Tabdeeli Hai?
Misal ke tor pe Surah Saad ki ek riwayat me “Malika” nahi hai, lekin maana wahi hai. Dono qira’at ek doosre ke barabar hain aur dono Nabi ﷺ se sabit hain.
Agar maana me koi fark nahi to usay tabdeeli nahi kaha ja sakta.
Quran ki hifazat sirf maana ki nahi — harf dar harf bhi hui hai. Lekin sirf wahi lafz asal mana jata hai jo Nabi ﷺ se sabit hai.
Bible Aur Quran Ka Farq – Asli Tafreeq Samjhen
Log Quran ke variations ko Bible ke contradictions ke barabar samajh lete hain — lekin ye false comparison hai.
Bible me tabdeeli logon ne baad me ki — alag alag versions, kings ke kehne par, aur translations ke zariye.
Jabke Quran ke andar jo mukhtalif qira’at hain wo khud Nabi ﷺ ki zindagi me exist karti thi, aur unhi ne ijaazat di.
Jaise agar main kahun: “Tomato” aur “Tomahto” dono sahi hain — to ye tabdeeli nahi, flexibility hai.
Akhri Sawaal Ka Jawab – Kya Ye Sab Change Hai?
Mufti Yasir ka jawab bohot powerful tha:
Jo farq nazar aata hai wo change nahi — balke wahi saboot hai ke Quran waqai mehfooz hai.
Agar ye sab variation na hoti to log poochte ke wo “Sab’ah Ahruf” yaani 7 letters jo Nabi ﷺ ne bataye the — wo kahan gaye?
Ye differences hi Allah ke wada-e-hifazat ka sabse bara saboot hain.
Logical Fallacy – False Equivalence
Jo log Quran ke variation ko Bible ke saath compare karte hain, wo “False Equivalence” fallacy ka shikar hain.
Bible aur Quran ki compilation, preservation, aur transmission me zameen aasmaan ka farq hai.
Nateeja Aur Dawat
Quran har lehaz se mehfooz hai — lafz bhi, maana bhi, pronunciation bhi.
Agar aap kisi bhi objection ka logical, tareekhi aur deen-e-Islam par mabni jawab chahte hain, to hamari website ImanUnion.com ka regularly visit karein.
